[轉載/蘋果日報] 馮仁昭四圍超：《談情說案》被轟抄襲 廣管局勁收投訴 2010年06月01日
無綫新劇《談情說案》開拍時，觀眾好有先見之明，一早就批評套劇內容涉嫌抄襲日劇《神探伽俐略》，劇集出街後網民議論紛紛，狂轟無綫，即使劇集收視高開，主角林峯、楊怡都力撐冇抄襲，但劇中種種情節同場景仍巧妙地同《神》相似，連日本傳媒都有報道呢單嘢。
收視高開
《談》劇雖然俾網民狂鬧，仲激到話應該腰斬，但《談》劇收視認真唔錯，上星期平均有 31點（約 198萬觀眾），係近期無綫黃金時段嘅叫座劇集，不過因為劇情有好多親熱戲，廣管局總共收到 19宗投訴， 12宗懷疑抄襲， 7宗指太多親熱戲，意識不良。
劇中同眾多女藝人合作嘅馬國明噚日話：「套劇係表達時下新一代對愛情睇法，頭幾集想突出角色比較激啲，我都係配合劇情同跟劇本去做。」
無綫都有收到一宗涉抄襲投訴，無綫外事部副總監曾醒明解釋：「電視畫面都係點到即止，馬國明角色係風流倜儻，到處留情，只係鏡頭交代番。有關跳樓情節就係關乎劇中案件調查，同近日校園跳樓事件純粹巧合，套劇舊年已經拍好。」
0 comments:
Post a Comment