[轉載/蘋果日報] 2010年06月09日 小妹都好鍾意自助旅遊，但帶住本磚頭咁大旅遊參考書穿州過省都幾痛苦。本地電子書開發商 Innopage創辦人之一嘅 Keith同小妹報料，公司喺周四國際旅遊展推出全港首本 iPad中文旅遊電子書《足足五千年》，方便輕巧之餘，仲提供大量相片同影片。用 iPhone睇都得。
講到咁好用，即刻約 Keith同作者項明生睇吓本電子書。項明生話，部書舊年底推出，刊載咗埃及、伊朗、緬甸、秘魯等 18國家資料。每個地方影咗幾千張相，但篇幅限制大部份相登唔到，同 Keith傾開電子書容量大好多，大家一拍即合。
大量相片影片 只賣$15
Keith話，之前公司只係出純文字小說電子書，首次推出有相嘅旅遊書要重寫程式，花咗成個月先做好，「呢本書唔單止有成三百幾張相，仲有埋片，可讀性好強。」
項明生解釋話，有啲旅遊經歷好難用文字交代，有埋片睇勝過千言萬語。佢即場播放《伊朗 44孔橋下的歌神》片段。部書字體大小、背景顏色都有得揀；仲可以將喜愛嘅內容放喺 facebook分享。項明生話，電子書賣$15，較賣$98嘅印刷版平 85%；另提供秘魯同日本嘅遊記免費下載。
「星期四起可以到蘋果 App Store購買，收益全數捐贈慈善團體小母牛喺內地扶貧；同日會喺旅遊展嘅國際漫遊協會 Z028攤位示範」。
[iPhone / iPad]
[化妝美容] [兒歌] [肥媽老友記] [旅遊飲食] [食譜] [MV] [運程] [最新影片]
0 comments:
Post a Comment