[消費] 小輪徑單車今夏潮爆

消費 blog：小輪徑單車今夏潮爆 2010年07月25日


[轉載/蘋果日報] 夏天嚟到，都要減吓肥肉，小妹身邊唔少姊妹都愛上踩小輪徑單車瘦身，其中俗稱小摺嘅摺叠款式更熱爆。小妹心郁郁都想買番部，但價錢一啲都唔平，好似美國品牌 Dahon八變速小摺，閒閒哋五、六千蚊。

本地品牌價平一半
Dahon香港總代理鎮洋兄弟單車公司董事總經理李達成 Jason話，小輪徑單車家好流行，今年上半年銷量按年大增一成半，女顧客比例更倍數急升，佔咗整體生意逾一成。公司最近因應本港巿場，開發自家品牌 20吋車轆小輪徑單車 Solar，總共四款，其中一款 Mini 20，仲免費提供畀苗圃行動喺 8月 14日出發嘅青海單車助學團嘅團友使用，「啲車會送晒畀團友，做善事兼推廣單車運動」。
本身係單車發燒友嘅鎮洋營運經理冼德超話， Solar車架以港人體形度身訂做，又因應本港天氣潮濕採取易打理嘅鋁合金管材，最重要價錢比同級嘅外國品牌平一半。好似 Mini 20，車架以平衡四邊形設計，彎曲嘅頂通，方便女仔上落車；新推嘅 FS-2016，設有吸震裝置，車頭有四個高度調校，最大賣點係摺得埋，「呢兩款車都好受女仔歡迎，同樣係 16變速，價錢賣$2380同$2780，同級外國品牌要賣成$5800」。
超哥又話，女仔最愛 Mini 20、 FS-2016，男仔最鍾意 Mini Pro同 Mini Pro-R，「呢兩部車設計係結合咗小輪徑車同公路車嘅特點，細得嚟車速夠快。只係賣$2750。有啲發燒友自己將小輪徑車改裝成公路車，起碼要七、八千蚊」。