[網熱] 咖啡仔鐵面無私抄交警牌

隔牆有耳：咖啡仔鐵面無私抄交警牌


[轉載/蘋果日報] 俗稱「咖啡」嘅交通督導員真係鐵面無私，有網民早前上載咗一條「千古奇聞──交通差佬被咖啡仔抄牌」嘅片上 YouTube，片中描述上個月 24號，一架警察電單車喺深水埗基隆街泊上行上路，附近居民睇唔過眼警車有特權，打電話投訴。
個半鐘頭後終於有咖啡到場，呢位咖啡大哥真係好嘢，冇話因為自己友就當睇唔到，手起刀落照抄，盛惠 320蚊。八方問過警察公共關係科，荃灣警區證實架車確係荃灣警署人員嘅電單車，話個警員當時行開咗執勤，警區已經對位阿 Sir訓示。睇到呢個古仔，八方奉勸其他電單車司機千祈唔好亂泊車，入停車場泊一日都未必要 320蚊。