[娛樂] 尋找C朗BB神秘媽咪

尋找C朗BB神秘媽咪：Paris爛玩最不像！疑去年賭城Ghazian機會高？


[轉載/youtube]
(蘋果日報世盃動物園)世盃等睇波時都幾悶，好彩有套大熱翻煲劇《天地豪情》陪住大家，戲入面由忠變奸嘅張家輝都幾陰功，到好大個至知親生阿媽係邊個。睇見戲入面嘅「細 B」，就令人諗起基斯坦奴朗拿度個 B（下稱朗 B）；因為 C朗講明唔透露媽媽身份，由佢獨自湊大個 B。 C朗唔講我哋搵，即管抽絲剝繭為朗 B搵媽媽！自從 C朗喺網上宣佈自己做老竇後，世界各大傳媒爭相估邊個係朗 B嘅親生媽媽。由俄羅斯水着女友艾琳娜（ Irina），兩年前曾經同 C朗打得火熱嘅意大利模特兒菲莉比（ Filippi）、上屆決賽周後陪 C朗散心嘅巴西索女萊卡（ Raica），仲有傳舊年同過萬人迷有一手（甚至幾手）嘅名媛性女 Paris Hilton，個個都講到似層層；不過，如果大家信葡萄牙傳媒，將目標鎖定為美國女子，咁範圍就收窄好多。上述提到嘅靚女，只有 Paris Hilton係美國人，之但係佢咁爛玩，好難叫人相信生性放蕩嘅佢肯為人生 BB。據講朗 B上個月至出世，睇 Paris近日身在南非睇世界盃，涉藏大麻獲撤銷起訴，走嚟走去身材冇話走樣，點計都唔似啱啱生完 BB喎！至於曾經自爆同 C朗共赴巫山嘅美國模特兒嘉絲安（ Ghazian），周圍唱 C朗，畀你係 C朗都唔會咁笨留情種畀佢啦！所以，答案可能係一個不知名嘅美國女子。舊年暑假搞乜鬼？梗係搞出人命！計番日子， C朗應該差不多係舊年暑假同人歡好後整件朗 B出嚟，而佢舊年的確喺美國拉斯維加斯嘆過世界。英國《太陽報》就登出一張佢同個不知名靚女嘅親熱相（圖），話唔定，佢就係朗 B親母。《福布斯》喺 4月公佈 C朗去夏由曼聯過檔皇馬後，首年薪金有 1,550萬美元，加埋贊助商年收 3,000萬美元。奉勸佢好好處理今次事件，否則俾人分身家就唔好啦！
疑似朗 B媽咪名單
最大嫌疑？不知名女子
國籍：不詳　年齡：不詳
與 C朗歡好時間：不詳
朗 B生母可能性：難以判斷
艾琳娜（ Irina）
國籍：俄羅斯　年齡： 24歲
與 C朗歡好時間：現在
朗 B生母可能性：★
Paris Hilton
國籍：美國　年齡： 29歲
與 C朗歡好時間： 09年
朗 B生母可能性：/
嘉絲安（ Ghazian）
國籍：美國　年齡： 26歲
與 C朗歡好時間： 08年
朗 B生母可能性：★★
菲莉比（ Filippi）
國籍：意大利　年齡： 32歲
與 C朗歡好時間： 08年
朗 B生母可能性：★
珍馬（ Gemma）
國籍：英國　年齡： 25歲
與 C朗歡好時間： 07年
朗 B生母可能性：★
萊卡（ Raica）
國籍：巴西　年齡： 26歲
與 C朗歡好時間： 06年
朗 B生母可能性：★
5★為最高　註：只列部份