[政治] 煲呔潮玩 iPad,鬥噏法文

煲呔潮玩 iPad,鬥噏法文 2010-07-14


[轉載/Youtube] [轉載/蘋果日報] 「廢廢哋」鬥噏法文反擊

立法會暑假休會前最後一次特首答問大會，社民連三子已經透過五區公投運動重返議會，自然又有好戲上演。噚日社民連黃毓民同陳偉業係咁追住煲呔狂砌，引用何俊仁名言謔稱煲呔喺政改談判中「廢廢哋」。
崩口人忌崩口碗，有備而來嘅煲呔引用一句法文"Honi soit qui mal y pense"回應，叫議員唔好惡言相向，難得係曾鈺成主席都識貨，喺叫陳偉業收口時字正腔圓讀出呢句法文，聽到在場人士嘖嘖稱奇。
曾鈺成唔執輸再讀一次
放大圖片

12345678910

其實煲呔識呢句法文唔出奇，因為 97年前嘅立法局主席座位背後牆上，就掛咗一個印有呢句法文嘅皇家徽號，雖然呢個徽號喺回歸時拆除，但煲呔身為港英餘孽兼英國爵士，又點會忘記祖家遺訓？難怪佢被陳偉業狂質廢廢哋時，會有感而發講出呢句法文，仲即時用英文解釋，話意思係"Shame on him who thinks evil of it"（心懷邪念者蒙羞），又話好可惜個徽號已經拆走，否則議員可能唔會隨便口出惡言。
煲呔廢廢哋，無論講中文、法文，都係不能改變嘅事實，後來佢以黃毓民提問冇禮貌為由，拒絕答問題，激到社民連三子紮紮跳，向來好文采嘅曾鈺成，似乎唔想俾煲呔搶咗佢呢個「識字王」嘅寶座，要求陳偉業收聲時，東施效顰但較煲呔更加字正腔圓咁用法文讀咗一次"Honi soit qui mal y pense"，好多議員即時大笑，難得曾主席保持冷靜，指示保安請毓民等人離場。
肥仔明忍唔住寸陳偉業

首次喺答問大會用 iPad讀稿嘅煲呔就冇乜表情，唔知係咪自嘆技不如人。民主黨肥仔明可能不忿主席何俊仁「廢廢哋」金句接連被社民連做子彈，但對方多謝都冇聲，發言時都忍唔住諷刺前黨友陳偉業，指五年前煲呔參選特首，陳偉業有份提名煲呔，究竟家係陳偉業變咗吖，抑或係煲呔變咗呢？即時逗得黨友、議員甚至煲呔發笑，笑得最燦爛嘅極有可能係當年被陳偉業拒絕提名、早前仲話人品衰過煲呔嘅泛民候選人李永達啦。