[轉載/蘋果日報] 號稱有廣大民意支持嘅「政制向前走大聯盟」，今個月 19號在維園舉行大型集會兼遊行，為咗湊夠當日參加人數，愛國社團紛紛利誘市民去撐場，福建社團聯會旗下泉州同鄉會更現兜兜派 200蚊畀鄉親，認真闊綽，好多人近日慨嘆投錯胎，來生要做福建人。
工會倡議最低工資 33蚊，參加幾個鐘頭集會、遊行收 200蚊，其實真係幾吸引，不過好多人唔稀罕呢啲嘢，有個「 80後」直斥咁做係埋沒良心。本身係福建人嘅可樂，對同鄉會派錢叫鄉親撐政改好睇唔過眼，自拍短片上網，呼籲鄉親唔好為咗 200蚊而出賣自己良心。
希望鄉親父老聽入耳
八方噚日搵到可樂，佢指派錢簡直係對所有福建人嘅侮辱，為咗達到政治目的，竟然利用福建人對家鄉、對鄉里嘅感情，手法太低莊，所以佢要用福建話向福建社團聯會說不，表明 200蚊買唔起一個人嘅良心，仲呼籲同鄉要做一個男子漢，有骨氣嘅福建人。
可樂話自己福建話十分有限，呢幾句抗議說話都要諗一段時間先識得講，要佢再講多啲都冇貨交，希望鄉親父老聽得入耳啦。
可樂係中文大學哲學系學生，經常去《城市論壇》同維園阿伯鬥大聲，又試過在時代廣場扮民主女神抗議，呢次講福建話反政改，令佢人氣再度爆升，好多網友勁讚佢夠潮，要求佢教講福建話，甚至有 fans幫佢喺 facebook成立群組。
保皇黨不惜勞民傷財搞撐政改大集會，如果民意真係可以用金錢堆砌出來，泛民都幾難鬥燒銀紙。有民主黨人同八方講，左派社團搞超平價 30蚊鯉魚門海鮮團，吸引街坊食完海鮮再去撐政改，真係十分揼本。
有左派社團搞海鮮團
據呢位「吃不到的海鮮是貴的」嘅民主黨員稱，一般街坊海鮮團成本價約 80蚊，連埋租旅遊車費用，不計行政費用最少都要收 100蚊位先打和，每位僅收 30蚊，即係要補貼七成。蝕大本都搞，顯示今次動員不容有失，倒轉頭睇，政改方案有幾多人支持，左派心知肚明。
[化妝美容] [兒歌] [肥媽老友記] [旅遊飲食] [食譜] [MV] [運程] [最新影片]
0 comments:
Post a Comment